2Cor 6 | WSK | STEP | Buta se ana Kaem ilak ura ilu se nina ninga manorsan, Kaem gomang ningaram ale ninga giam, bare ninga bagara aolak te ko nunguning me kapuruk bore ko ninguru sinar talko.

2 Corinthians 6

1 Buta se ana Kaem ilak ura ilu se nina ninga manorsan, Kaem gomang ningaram ale ninga giam, bare ninga bagara aolak te ko nunguning me kapuruk bore ko ninguru sinar talko. ^{▼▼2 Cor 6:1-2 Isaiah 49:8. Den am ipi me ikinakko: James 2:14.} 2 Mu awuk, nu balam,

“Tom ani kariimet nunga aira ikiekko tom mu te ani nika aira ikiem;
ale tom ani kariimet nunga sangaru taikko tom mu te ani ka sangem.”
Buta se ikialko. Aitak tom imi mu Kaem kariimet nunga aira ikiokko tom, aking aitak tom imi mu kariimet nunga sangaru taukko tom.

Apostle nunguning alo ikup duap duap gikasan

3 Se ana kariimet nanga ura ningi memek aringimon bore ko ninguru sinar tasan, ale munan mel bo kariimet te dagulomonko mu ago me betesan. Mena. 4 Mel suen biya ana betesan mu kariimet te aringimon ikimon, ana Kaem ko ura kari nunguning ma nanga balmonko. Ana ikup yaman ninguru nanga ereso bare am sokel ago la te sanamasan. 5 Anananga mosan, nanga talipasan, aking biguwusan ale nanga bita maguwusan. Ana ura kowar ninguru tasan, ale tom saki me anisan, aking na me nasan tala. 6 Kariimet ningi ana munan ningo diram la betesan, ale ikia ningo nunga kasursan, alis ago mena, welang te yawarakala arungu bagasan. Ana Korang Bur ko munan nangarso se te ura betesan, ale kariimet ninguru nunga kuesan. 7 Ana den nunguning la balsan, ale Kaem ko sail te ura ilusan. Ana munan diram gatu iwita nagiting ngas sengam ilusan ale te kagersan.

8 Kariimet saki mu ana nainip patowasan, bare saki mu nainip maguwusan. Saki nanga bagara aolak yawarakala ko nanga balsan, bare saki nanga balu maguwusan. Ana kari nunguning, bare kariimet saki nanga balsan ana kawel kari ko nanga balsan. 9 Kariimet nanga ikisan, bare me nanga ikia iwita nanga betesan. Ana kuenakko nanga balsan, bare ana am marak bagasan. Nanga mosan, bare me kuesan. 10 Ana nangamang batagoso, bare tom suen biya amilmil te bagasan. Nangimik melmasak mena, bare mel suen biya kariimet nungarsan. Nangate mel bo me aniso, bare aking mel suen biya nangate aniso. ^{▼▼2 Cor 6:10 Den iwitata mu English den te paradox masan, mu kariimet den ko nunguning nunguningkiri te ninguru kupumon ale ko ikimonko.}

11 Nanga singsang Corinth ningi, ana ninga kuesan, ale nangamang motam ulalawu sapaman ale den wetang te la ninga manorman. 12 Ana nina nego ko nangamang motam kagorman. Bare nina ana nago ko nengemang motam me kagaru ulalawu nangarman. 13 Se ani aitak nina aninga kuriang iwita ninga manorsam, ana nina nego ko munan betesan iwitatala, nina nengemang motam ninguru nanga kueralko.

Kris kariimet mu Kaem ko kawam laili kako nunguning

14 Nina kariimet nongomang ningi nunguning mena mu arungu me kapetaralko. Mu awuk, kariimet munan diram betesan mu awuk ta kariimet munan memek betesan mu arungu biguwumonko? Se nikim mu awuk ta tiromorom ilak wete bagomonko? 15 Se Kristus mu Satan ilak nongomang suwanta bagomon i? Se kari gomang ningi nunguning mu awuk ta kari gomang ningi nunguning mena mu ilak wete bagomonko ya? 16 Se awuk ta ana Kaem ko kawam kako mu kaem kawel se ko bur memek mu ago nunga biguwunakko? Mena. Mu awuk, Kaem marak bagoso mu ko kawam kako mu ana nangata Kris kariimet ewerta. Kaem kota balam iwitata: “Ani arungak baga se nunga ningi geragikko. Ani mu nunga Kaem ko bagirikko, se nuna mu aninga kariimet ko bagomonko.” ^{▼▼2 Cor 6:16 Lev 26:12; Jer 32:38. Kris alo mu Kaem ko kawam laili: 1 Cor 3:16.} 17 Umutang ko Kari Biya agotala balam,

“Mu nina nunga beteral ale kelemak bagaralko;
ale mel memek karur ago mu me ilu talko,
mu asele ani ninga giekko.” ^{▼▼2 Cor 6:17 Isaiah 52:11; Ezekiel 20:34,41.}
18 “Ani mu nenenga Nenet ko bagirikko,
se nina mu aninga kuriang kari se imet ko bagaralko.
Kari Biya Sokel Garagar mu uwutata balam.” ^{▼▼2 Cor 6:18 2 Samuel 7:14; 7:8. Revelation 18:4 ago arikko.}